حكايه من حكاوينا كل يوم بنشوفها
وبنحس بيها وبأوجاعها
حكايه ناس بسيطه وناس عاديه
وناس غلبانه بجد
حكايه كل يوم بتأثر فينا وبتوجعنا
حكايه مش بتتزوق بحروف ولا بجمل
ولا بتتزوق بكلام فاضي وتتلمع
حكاية ناس مننا وحوالينا
ناس من بلدنا
ناس موجوده ومش موجودة
حكايه ناس بتحب تراب البلد دي
حكايه ضعف مش قوة
حكايه مش غريبه علينا
بس غريبه ومهمله في عقول بعض مننا
ااااااااااه مننا
حكايه وحدوته كل يوم بتوجعنا
بحلوها ومرها
وبحكم شغل كل واحد مننا بنشوف نفس
الحكاية بتتكرر وبتتعاش
حكايه مواصلة
كل يوم بنسمع نفس الحكايه ونفس الجمل
ونفس التعب ونفس الوجوه العابسة
ونفس العيون اليائسة
في المواصله
ركبت لقيت 11 راكب
فيهم ست عجوزة
وبنتين
و 8 من الشباب بسن مختلف
دار الحوار
اتنين صحاب جمب بعض
ياسيدي والله تعبت كل يوم رايح الشغل جاي من الشغل
بنموت ياعم بالبطيء واللي جاي علي قد
اللي رايح وياريته مكفي
رد صاحبه
ياعم الناس كلها كده بتجري علي لقمه العيش
عيش مين ياعم انت تعرف ان ساعات مابنلاقيش اللقمه دي
ردت الست العجوز
ياابني قول الحمد لله علي الصحه
المهم يا ابني البركه في الرزق
حتي لو كان دخلك بسيط وفي بركة
هايكفيك احمد ربنا يا ابني
احنا واحنا في سنك عشنا من غير كل الحجات الموجوده دلوقتي
حجات ايه يا أمي الحلوة دي في كل التلوث الموجود حوالينا ده
تلوث في الهوا والاكل والميه
تلوث في عقولنا وكلامنا حتي سمعنا تلوث
حتي العيشه كلها اتلوثت بافكار واتلوثت
بالوصطه والمحسوبيه
يا امي انا خريج كليه تجاره ومش لاقي تعيين
اشتغلت في حجات كتير واتبهدلت
وكل يوم بقول هاتفرج وتتعدل
عمري ماتكبرت علي شغل طول ما هو حلال وبعرق جبيني بجيب لقمه العيش
انتي عارفه يا أمي انا شغال فين
فين يا ابني
علي عربيه فول
ربنا يعينك يا ابني ويرزقك
والله يا أمي تعبت ناس كتير مش حاسه بينا ومش شايفانا
هو احنا ليه بقينا كده
احنا بشر وبني ادمين بس حاسين ان احنا
مش موجودين مكروهين
دخل واحد تاني في الكلام يا ستي شوفي شيكاره العلف بقت بكام
رد واحد تاني يا عم علف ايه بس شوف
الكهربا وصلت كام
والميه والصرف الصحي وكارت الاتصالات
حتي السجاير غلوها
رد واحد تالت ياعم علف ايه وكهربة وميه ايه
داكله ممكن نستغني عنه
شوف الأكل والخضار بقي بكام
مش هاقولك اللحمه والسمك
رد واحد رابع ياعم محدش حاسس بينا وبمشاكلنا
انت بتأذن في مالطه
ردت العجوز
يا ابني كل الكلام ده كويس ومشاكلكم بسيطه وحلولها بأيدكم
خليكم مقتنعين بكلمه البركه في الرزق
هو ده رزقك ومقسوملك
خليك راضي واشتكي دايما همومك لربنا
يا ابني احنا كنا عايشين في بيوت من الطين
كل اللي فيها شريط حصير وسقف من خوص
كانت حياتنا بسيطه اتعبنا واشقينا اكتر منكم
رد واحد يا امي زمانكم غير الزمن ده
ردت الست يا ابني العيب فيكم
عايزين كل حاجه سهله تحت رجليكم
اتعبوا واشقوا علشان لقمه العيش
وخلي عندك رضا بالمقسوم
رزقك يا ابني مكتوبلك هايجيلك مهما تعمل
رد واحد تاني احنا مش عايشين احنا ميتين
عايشين في التراب وتحت التراب
كله بيدوس علينا
احنا مفرومين بنلف كل يوم في الساقيه ومفيش جديد
شغلي كل يوم روتين بروح الشغل وباجي من الشغل
ايه اللي بعمله وايه المطلوب مني اعمله مفيش
المهم اني اروح الشغل
وياريت الدخل بيكفيني انا واعيالي
كل حاجه بتغلا ما بترخصش العيشه واللي عايشنها بقت لاتطاق
تعبنا من وشوشنا اللي بقت كلها زي بعض
وشوشنا اللي عليها كوم تراب
ونظرات الحزن والالم الناس بقت ماشيه بتكلم في روحها
اجيب منين ويودي علي فين
الناس تعبت من كتر الاسيه
رد واحد تاني يا عم انا بشتغل صنايعي في فرنه عيش
بشتغل يوميه 120 جنيه والله مش مكفيني
يدوب بروح البيت بيخلصوا اشي مش عارف ايه واشي ايه ادور الاقي جيبوبي متنفضه
شغلي في حته اسمها التفتيش تبع انشاص الرمل بلبيس شرقيه
انت تعرف يا استاذ جم 15واحد امبارح هجموا علي مدرسه
كل واحد شايل ألي وهجموا علي مدرسه واستولوا علي كل الموتوسيكلات
اللي في المدرسه غير تليفونات المدرسين عيني عينك ساعه ضهريه
شوف يا اخي الدنيا
الناس لما بتجوع بتفتري علي بعضها
المهم ان كلهم غلابه
مش مزعلني غير العيال الصغيرة
الطلبه اللي شافوا الشكل ده قدام عنيهم
هايحلموا ازاي ببكره
هتروح الصورة دي ازاي من عيونهم
ردت بنت من اللي قاعدين قالت انا بشتغل في شركه ملابس
مرتبي يدوب بساعد بيه في مصاريف البيت
حقوقنا في المصنع ضايعه كل القوانين في صالح رجال الاعمال
مفيش تأمينات علينا ولا امن صناعي ولا خدمات صحيه
بس انا محتاجه المرتب ده العيشه بقت غاليه والحياه اصبحت نار
كل ماقول اشتري حاجه لنفسي الاقي البيت محتاجها
لا البيت اولي
تعرفوا علشان الدخل ضعيف بنعمل ايه
بنلم بواقي الخضار من السوق حاجه كده ماتتاكلش بس بنجيبها ليه علشان سعرها
يا عم احنا بناكل من الزباله
بنوفر في الطقه علي شان نعيش وياريتنا عايشين
وشويه وقفت العربيه
واتفرقت الناس
فين الناس وفين حكايتهم اتفرقوا
ووشوشهم متشابهه عليها الهم والحزن
ماشيين بيحلموا ازاي كل يوم يجيبوا لقمه العيش
طيب لو في يوم تعبنا مين هايحس بينا
الناس دي مننا
الناس دي حوالينا
تعالوا نحس ببعض
تعالوا نكون بشر وبني ادمين
ياريت بأيدي اسعد كل البشر
ياريت اقدر اغير نظرة في عيونهم
ياريت كلنا نحس بالناس
كن انسان وعيش بني أدم
