مر الزمان وهجرنا الحب والأحباب ...
وقلوبنا تبلدت من كتر ما فيها ...
واليوم تعبت عيوني والدهر غلاب ...
ودروبنا تبدلت حتى أساميها ...
وين الشباب الهرب مني وفل وغاب ...
ووين البيادر ووين الدهر خافيها ...
ووين السواقي اللي كانت باردة في أب ...
نشفت ويبس الشجر والطير باكيها ...
...............................
يا ديرتي اللي ابتلت غزلانها بدياب ...
وجاست وحوش الأرض فيها وضواريها ...
خانك الأهل وأجرموا فيكي بدون حساب ...
وعضوا الأيادي الأحسنت إلهن أهاليها ...
وتأمروا علكي بعمالة والطبع غلاب ...
ومشيوا بطريق الخيانة وارتموا فيها ...
وظن الجبان الندل نفسو سبع بالغاب ...
وصار الغبي الجاهل الكذاب داعيها ...
ناديت رب السما يسخى ولو بشهاب ...
يضوي عقول البشر والناس يهديها ...
ويسود عنا اللي عقلو راجح وأواب ...
وترجع لأرضي العدالة ونحتمي فيها ...
ويخلا الوطن من النهاب والنصاب ...
وتعود إلنا الأرض والكل يبنيها ...
وتبقى المحبة وتترك بيتنا الأغراب ...
وتبقى الديار بأمن والرب راعيها ...
.....................................
يا تاركين البلد يا أهلنا الغياب ...
عودوا ربوع الوطن إلكن مغانيها ...
عودوا لنا يا هلي للدار والأصحاب ...
وتعطروا بالتراب اللي بأراضيها ...
عميت عيوني بكا عفراقكم يا حباب ...
والشوق يفري المهج والدمع ساقيها ...
مافي ربوع بهالدني ومافي أرض وتراب ...
يعلا على اللي بسوريا وأراضيها ...
...............................................
وليد الأصفر
