كنا نلعب ..
ملك .. وكتابة
نغنى ع الربابة
اغانى مزروعة حبابة !!
ماشوفنا يوم .. ديابة
ولا عمر قلبنا انكسر
ف أى سكة سفر !!
كنا بنلعب .. استغماية
نتغمى .. ورا الحواية
كان يضحك معانا .. القدر
عمره ما أفتكر ..
يعمل خوانة
يستخبى ف حضن القمر
ف حضن دافى ..
ودرواية
ولما نرجع الدار ..
نحلم مع الكبار
يطلع الحلم ..
لابس توب مزهر
نئدن ..
الله اكبر !!
الحياة كان ليها ..معنا
كام معنى .. و 1000 معنى !!
كنا نتكلم .. تسمعنا
تردد .. المغنى
والهم ساكن ف الدواير
بعيد عننا .. طاير
نتوه جوا المنام
نصحى ع صوت اليمام
والفجر يدن ..
نقوم نكبر
نصلى .. و ع الغيط ..
قوام !!
كنا نفطر .. عيش محمر
متغمس بحلو الكلام
وكان لحوقى معمر
محشيين حمااااام !!
قشطة .. يابا !!
وكام .. كاس .. غرام
الحب كان ساكن ..
ف القلوب
و النهاردة ....
السواقى ..
راحت تتوب ..
عن المحبة ..
حبة .. حبة
والمكتوب
ع الجبين ..
من سنين
كل فرع ملوهش أصل !!
يبقى عار .. و 1000 عار !!
ف كل حتة وكل دار
تبقى بقة ماشية .. زقة
ف حضن دقة ..
ف حضن زار
كنا نلعب .. ما حد يغلب
وقت الجد ما حد يهرب
ويجى وقت ..
يكون هزار
كنا ضل .. لو حد .. ضل !!
شرب يوم .. كاس مرار
كنا يومها .. أطفال صغار
لكن عقولنا .. عقول كبار
كات ايام .. ولا ف الأحلام
كات الكلمة ..
ب 1000 000 فدان
والفدان مزروع مرجان
كان توبها أخضر
لو تمس القلب .. يخضر
من طراوة الحروف
كات الكلمة .. تصنع انسان !!
كل خوف .. كان بيجرى
من قدام .. قطر الأمان
والحنان كان ..
لونه خمرى
تكحل بيه المدام
اليمام كان يبيض
وينام ع البيض ..
ف المنام !!
يفقس قبل الأوان
فى حارة الطيبين
كات التقوى ..
تسر الخواطر
كل شاطرة .. وكل شاطر
كانوا مزروعين
مرويين .. بالحنين
ف حارة الفلاحين
بتاع ... زمان
كان توب الحنان ..
فارد جناحه ..
بالمحبة والاحترام
مستخبى ..
ف حضن الأمان
ف شوارع ..
حارتنا ..
كان السلام ..
فارد ضلوعه
قايد شموعه
مكنش فيه ضلام
ف حارة الفلاحين ..
حارة الناس الطيبين
بتاع ... زماااان
