.السما عم تشتي ... بقلمي .. ملك الأصفر

قصيدة باللهجة العامية ... بعنوان ...السما عم تشتي ... بقلمي ... 
..............................................
السما عم تشتي والقلوب فرحانة
و الحقلة عم تشرب والدني ضحكانة
والغيمة مسرورة و بالخير مليانة
والشجر عم يرقص والأرض حليانة
والناس مسرورة بالمطر والخير
وغنت العصفورة شرب الزرع والطير
ورجع الفرح تاني وضحكات عليانة
والفرحة عمرانة يا رب يدوم الخير
..............................
لما الدني تشتي بيزقزق العصفور
بيملا الدني غناني وبيرقص وبيدور 
وبيضحك المنتور عنا بأرض الدار 
وبتغتسل لزهور يلي على الأسوار 
بيمشي النهر تاني ورقصات وغناني 
والسمكة فرحانة بمية الأمطار 
والحب من تاني راجع لأوطاني 
ودبكات عمرانة يا أهلا بالزوار 
..............................
لما الدني تشتي بتتبسم الأيام 
بيحلا الحلا أكتر وبتكبر الأحلام 
بيزيد عطر الكون بتتعطر الأنسام 
و بألف لون ولون بتتلون الأنغام 
بتزهى الدني أكتر والخيرات بتكتر 
والحب شو بيكبر مننطق أحلى كلام 
وبتحلا الأغاني والفرحة من تاني 
وليالي عمرانة وبرفرف السلام
.............................................
 ملك الأصفر