لسانى بادور جوايا بقلم / احمد المصري‏

لسانى بادور جوايا 
على فيلم قديم ابيض واسود 
انا اصلى زهقت من الالوان 
لسانى حنينى بيغلبنى 
وياخدنى بعيد 
يرمينى ف حضن 
صلاة العيد 
والتخته وقشعرة السقعه
ونأجر عجلة ونتأخر
ونتوه ونلف بعيد نرجع 
لسانى حنينى بيرمينى
لفانوس رمضان 
ونلم فلوس لجل 
اما نعلق فرع النور 
ونروح نلعب كورة 
ونلقى 
باب المدرسة 
يوم الجمعة طبعا مقفول
وننط السور 
كانت ايام 
والجار اللى تملى يزعق 
علشان مش عارف م الدوشه 
يرتاح وينام 
لسانى بدور جوايا
على فيلم قديم 
ابيض واسود 
 فى زمان بهتت فيه الالوان